Sooraj ki pehli madhham kiran
Komalata se jab tan ko chooti hai
Tumhare prem ka sparsh de kar
Rom rom pulkit kar deti hai
Tumhare chehre ki
maadak muskurahat se
Prakriti mein mehak bikhar jaati hai
Tumhari naisargik aakarshak chata dekh
Mere hridya ki dhara swayam hi
Tumhare prem mein anubadh bahti chali jaati hai
Baraf si thos meri rooh
kewal ek hi kshan mein
Tumhare sannidhya ki garmahat se pighal jaati hai
Yeh utkantha… tumhe pa kar
tumhi mein kho jaane ki
Mujhe aatur kar prem-agni mein jalati hai
Thandi hawa ke jhonke ki
sar sar dhwani
Jab tumhari sarv-vyaapakta ka sanket deti hai
Tumhari upasthiti mujhe sanmmohit kar
vichaarshunya kar deti hai
Tumhe ek shishu samajh kar prem karoon
Ya tumhe swami kah kar
Tumhare charnon ki dhool ban jaaon main
Ya sirf prem-sagar mein doob kar
Apne priyatam ko niharoon
Ya chup rah kar…
Pratyek paribhasha se prithak
Tum hi ban kar…
tum mein mil jaaon main
Kaise samjhoon kya chahte ho tum
Prati kshan ye duvidha mujhe
bechain karti hai
Mere jeevan ki vatika

patjhad ki tez aandhi mein bhi
Tumhare ek sambodhan ki
bahaar ka intezaar karti hai
Aur jab mujh apaatra par …….
Tum apne aseem prem ki varsha karte ho
Main shabd-viheen ho kar
bhaav-vibhor ho udhti hoon
Meri aankhen aansooon ki bhasha mein
tumhara dhanyawaad karti hain
Phir ek kshan mein tum
Aankhon se ojhal ho jaate ho
Tumse phir milne ki
tumhara sannidhya paane ki chahat
kshan khsan mujhe nav-jeevan deti hai
Sandhya ke doobte sooraj ki laalima
jab dharti ko laal chaadar se dhak deti hai
Mere saare sanshay aur sandeh
swayam mit jaate hain
Mere hriday ki pyaas us kshan
tum phir jagate ho
Par saath hi tum mujhe
adhoora chaand dete ho
Tumhari chavi hum dono se
praatah kaaleen sooraj ki pratiksha karati hai
Is pratidin ki aankh michoni mein
jitna main tumhare paas aati hoon
utne door jaate …
tum prateet hote ho ….
Phir bhi tumhari adrishya shakti
chumbak ki tarah
mere hriday ko apne paas kheenchti hai
Abhaavon ke madhya mein bhi
Tumhare prem ke sparsh ki ek anubhooti
sampoornta ke ras mein mera
kan kan bhigo deti hai